വെല്ലിങ്ടണ്: ലോകത്തെ ഏക വെള്ള കിവിപ്പക്ഷി മനുകുറയ്ക്ക് ശസ്ത്രക്രിയയിലൂടെ പുതുജന്മം. ന്യൂസീലന്ഡിലെ നോര്ത്ത് ഐലന്ഡ് വന്യജീവി കേന്ദ്രത്തിലെ അന്തേവാസിയാണ് ആറ് മാസം പ്രായമുള്ള മനുകുറ. വിശപ്പില്ലായ്മയായിരുന്നു മനുകുറയുടെ അസുഖം. ഒരഴ്ചയായി തീറ്റയെടുത്തിരുന്നില്ല. എക്സ്റേ പരിശോധനയില് ആമാശയ അറയില് രണ്ട് വലിയ കല്ലുകള് കണ്ടു. താമസിയാതെ വെല്ലിങ്ടണിലെ ആസ്പത്രിയില് പ്രവേശിപ്പിച്ചു. ലേസര് ഉപയോഗിച്ച് കല്ല് പൊടിച്ചു കളയുന്ന രണ്ട് ശസ്ത്രക്രിയകള് നടത്തി. ഇപ്പോള് മനുകുറ സുഖം പ്രാപിച്ചുവരിയാണെന്ന് വന്യജീവി കേന്ദ്രം അധികൃതര് അറിയിച്ചു. മറ്റുപക്ഷികളെപ്പോലെ കിവികളും ദഹനത്തിന് സാഹായകമാകാന് കല്ലുകള് വിഴുങ്ങാറുണ്ട്. ആമാശയത്തിന് ഉള്ക്കൊള്ളാനാവുന്നതിലും അധികം കല്ലുകള് മനുകുറ വിഴുങ്ങിയതാകാം പ്രശ്നമായതെന്നാണ് കരുതുന്നത്. ന്യൂസീലന്ഡിന്റെ ദേശീയ പക്ഷിയാണ് പറക്കാത്ത കിവി. കറുപ്പ്, ചാര, ബ്രൗണ് നിറങ്ങളിലാണ് ഇവ സാധാരണ കാണപ്പെടുന്നത്. അത്യപൂര്വമായ ഒരു വര്ണസങ്കരമാണ് മനുകുറയ്ക്ക് വെള്ളനിറം വരാന് കാരണം.
Posted on: 02 Nov 2011 Mathrubhumi world News
No comments:
Post a Comment