"ശാസ്ത്രലോകത്തിന് കൗതുകമായി കണ്ടൽക്കാടുകളുടെ അടിത്തട്ട്; കൊല്ലം സാമ്പ്രാണിക്കോടിയിലും കണ്ണൂരിലും നടത്തിയ പഠനത്തിൽ കണ്ടെത്തിയത് പുതിയ സമുദ്ര വിര വർഗ്ഗങ്ങൾ."
കൊല്ലം, കണ്ണൂർ ജില്ലകളിലെ കണ്ടൽക്കാടുകളിൽ നിന്ന് സമുദ്ര ഗവേഷകർ ശാസ്ത്രലോകത്തിന് പുതിയതായ അഞ്ച് സൂക്ഷ്മജീവികളെ കണ്ടെത്തി. കേരള സർവകലാശാലയിലെ അക്വാട്ടിക് ബയോളജി ആന്റ് ഫിഷറീസ് വകുപ്പിലെ ഗവേഷകരായ ഡോ. ജിനി ജേക്കബ്, പ്രൊഫ. എ. ബിജു കുമാർ എന്നിവരുടെ നേതൃത്വത്തിലുള്ള സംഘമാണ് കണ്ടൽ ആവാസവ്യവസ്ഥയുടെ അടിത്തട്ടിലെ അവസാദങ്ങളിൽ നടത്തിയ പഠനത്തിലൂടെ പുതിയ അഞ്ച് സമുദ്ര വിര വർഗ്ഗങ്ങളെ (Marine Nematodes) കണ്ടെത്തിയത്. കൊല്ലം ജില്ലയിലെ സാമ്പ്രാണിക്കോടിയിലും കണ്ണൂരിലെ കണ്ടൽക്കാടുകളിലുമാണ് ഈ സുപ്രധാന പഠനം നടത്തിയത്. അന്താരാഷ്ട്ര ശാസ്ത്ര പ്രസിദ്ധീകരണമായ 'മറൈൻ ബയോഡൈവേഴ്സിറ്റി'യിലാണ് ഈ കണ്ടെത്തലുകൾ പ്രസിദ്ധീകരിച്ചിരിക്കുന്നത്.
കണ്ടാൽക്കാടുകളുടെ ചളിനിറഞ്ഞ അടിത്തട്ടിൽ സ്വതന്ത്രമായി ജീവിക്കുന്ന ഈ സൂക്ഷ്മജീവികൾ സമുദ്ര ആവാസവ്യവസ്ഥയിൽ അതീവ നിർണ്ണായകമായ പങ്ക് വഹിക്കുന്നവയാണ്. കണ്ടൽച്ചെടികൾ പൊഴിക്കുന്ന ഇലകളും ജൈവാവശിഷ്ടങ്ങളും വേഗത്തിൽ വിഘടിപ്പിച്ച് മണ്ണലിയിക്കുന്നതിനും പോഷകചക്രമണം സുഗമമാക്കുന്നതിനും ഈ ചെറിയ വിരകൾ സഹായിക്കുന്നു. ബാക്ടീരിയകളെയും ആൽഗകളെയും ആഹാരമാക്കുന്ന ഇവ കണ്ടൽക്കാടുകളിലെ വലിയ മത്സ്യങ്ങളുടെയും മറ്റ് സമുദ്രജീവികളുടെയും ആഹാര ശൃംഖലയിലെ സുപ്രധാന കണ്ണിയാണ്.
ശാസ്ത്രീയമായി ഏറെ കൗതുകമുണർത്തുന്നതാണ് ഈ കണ്ടെത്തൽ. പ്യൂഡോക്രോമാഡോറ എന്ന ജനുസ്സിൽപ്പെട്ട ഈ ജീവികളെ അറബിക്കടലിൽ നിന്ന് ആദ്യമായിട്ടാണ് ഔദ്യോഗികമായി രേഖപ്പെടുത്തുന്നത്. പ്യൂഡോക്രോമാഡോറ കൊറോണേറ്റ, പ്യൂഡോക്രോമാഡോറ ക്രിപ്റ്റിക്ക, പ്യൂഡോക്രോമാഡോറ കൈരളി, പ്യൂഡോക്രോമാഡോറ കൻഡേലി, പ്യൂഡോക്രോമാഡോറ ലോങ്ികൗഡാറ്റ എന്നിങ്ങനെയാണ് ഇവയ്ക്ക് നാമകരണം ചെയ്തിരിക്കുന്നത്. കേരളവുമായുള്ള ജൈവിക ബന്ധത്തെ ഓർമ്മിപ്പിക്കുന്നതിനാണ് ഇവയിലൊന്നിന് 'കൈരളി' എന്ന പേര് നൽകിയത്. നഗ്നനേത്രങ്ങൾ കൊണ്ട് കാണാൻ കഴിയാത്തത്രയും ചെറിയവയായ മൈയോഫൗണ വിഭാഗത്തിൽപ്പെടുന്ന ഈ സൂക്ഷ്മജീവികളുടെ കണ്ടെത്തൽ, കേരളത്തിലെ കണ്ടൽക്കാടുകളുടെ പാരിസ്ഥിതിക പ്രാധാന്യവും അവിടെ നിലനിൽക്കുന്ന അദൃശ്യമായ ജൈവവൈവിധ്യ സമ്പത്തും ലോകത്തിന് മുന്നിൽ ഒരിക്കൽ കൂടി തുറന്നുകാട്ടുന്നതാണ്.







.jpg)
