ജാജ്പുര്‍: ഒറീസ്സയിലെ ജാജ്പുര്‍, കേന്ദ്രപാഡ ജില്ലകളില്‍ ഏറെ ഗ്രാമങ്ങള്‍ക്കു ജീവശക്തി പകര്‍ന്ന ബ്രാഹ്മണി നദി മരണത്തോട് അടുക്കുന്നു. ഒരു കാലത്ത് ഒട്ടേറെ മത്സ്യങ്ങളുണ്ടായിരുന്ന ബ്രാഹ്മണിയിലെ തെളിനീരായിരുന്നു ഇരുകരകളിലും ജീവിക്കുന്ന മൂന്നു ലക്ഷത്തോളം പേരുടെ ആശ്രയം. ഉത്ഭവ കേന്ദ്രങ്ങളില്‍ മണ്ണടിഞ്ഞും വ്യവസായശാലയിലെ മലിനജലം കെട്ടിനിന്നും പലയിടത്തും കറുത്ത, ദുര്‍ഗന്ധം വമിക്കുന്ന നീര്‍ച്ചാലായി മാറിയിരിക്കുന്നു ഇന്ന് ഇത്. കലിംഗ നഗര്‍ മേഖലയിലെ വ്യവസായശാലകള്‍ അനധികൃതമായി ജലം ചൂഷണം ചെയ്യുന്നതായി ബ്രാഹ്മണി നദി സംരക്ഷണ സമിതി കണ്‍വീനര്‍ ഗഗന്‍ ബെഹരി പറയുന്നു. ''മഴ കുറഞ്ഞതുകാരണം നദി വരണ്ട് പ്രശ്‌നം കൂടുതല്‍ രൂക്ഷമായത് ഈ വര്‍ഷമാണ്. ജലസേചനത്തിനുപോലും വെള്ളമില്ല''- അവര്‍ പറഞ്ഞു. മഴവെള്ളം സംഭരിക്കുകയും മലിനജലം ശുദ്ധീകരിച്ചു വിടുകയും വഴി നദിയെ രക്ഷിക്കാനാകുമെന്ന് അവര്‍ വ്യക്തമാക്കി. ബ്രാഹ്മണിയുടെ വൃഷ്ടിപ്രദേശമായ ജെനപുരിലും ബേദിപുരിലും മണ്ണിടിച്ചിലും മണല്‍ വന്നടിയുന്നതും ഒഴിവാക്കിയാല്‍ പ്രശ്‌നം ഒരു പരിധിവരെ പരിഹരിക്കാനാകുമെന്നാണ് ജല വകുപ്പ് എക്‌സിക്യൂട്ടീവ് എന്‍ജിനീയര്‍ സുപ്രത്ദാസ് അഭിപ്രായപ്പെട്ടത്. ജലവകുപ്പിന്റെ നിര്‍ദേശത്തെത്തുടര്‍ന്ന് ഇതുമായി ബന്ധപ്പെട്ട് സര്‍വേ നടന്നുവരികയാണ്.
Mathrubhumi news 15 Oct 2010
No comments:
Post a Comment