പ്രമുഖ സര്‍ക്കസ് കമ്പനിയുടെ രണ്ട് പിടിയാനകളെയാണ് ബുധനാഴ്ച ബാരിക്കേഡില്ലാത്ത ഒരു ലോറിയില്‍ കയറ്റി കായംകുളത്തുനിന്ന് പെരിന്തല്‍മണ്ണയിലേക്ക് കൊണ്ടുപോയത്. യാത്രക്കിടെ ആനകള്‍ തുമ്പിക്കൈയുയര്‍ത്തി മരച്ചില്ലകളിലും അടുത്ത വാഹനങ്ങളിലും പിടിക്കാന്‍ ശ്രമിക്കുന്നുണ്ടായിരുന്നു. ഉച്ചയ്ക്ക് ഒന്നരയോടെ ദേശീയപാതയിലൂടെ വന്ന ലോറി പുന്നപ്ര പോലീസ് കസ്റ്റഡിയിലെടുത്തു.
ലോറിഡ്രൈവര്‍ കൊല്ലം കിളികൊല്ലൂര്‍ അനീഷ് ഭവനില്‍ അനീഷ് (26), ക്ലീനര്‍ കരുനാഗപ്പള്ളി തെക്കുംഭാഗം കൊരുന്നയില്‍ വീട്ടില്‍ കലാധരന്‍ (47), പാപ്പാന്‍ ബീഹാര്‍ പാറ്റ്‌ന ജില്ലയില്‍ രാജബജാര്‍ ഗ്രാമത്തില്‍ നബിബക്‌സ് നിസാം (62) എന്നിവരെ അറസ്റ്റു ചെയ്തു. ആനകളോട് ക്രൂരത കാട്ടിയതിനും നാട്ടാന പരിപാലന നിയമലംഘനത്തിനും ഇവര്‍ക്കെതിരെ കേസെടുത്തു.
റോഡരികില്‍ നിര്‍ത്തിയിട്ട ലോറിയിലെ ആനകളുടെ പ്രകടനം കാണാന്‍ നിരവധി പേര്‍ തടിച്ചുകൂടി. തുമ്പിക്കൈ ഉയര്‍ത്തിയും തലയാട്ടിയും ആനകള്‍ കൗതുകം പകര്‍ന്നു. തുമ്പിക്കൈ നീട്ടി വൈദ്യുതി ലൈനില്‍ പിടിക്കാനും മരക്കൊമ്പൊടിക്കാനും ആനകള്‍ ശ്രമിച്ചു. മണിക്കൂറുകളോളം ഭക്ഷണവും വെള്ളവുമില്ലാതെ ആനകളെ നിര്‍ത്തിയതില്‍ കാണികളായ ചിലര്‍ പ്രതിഷേധിച്ചു. വൈകിട്ട് അഞ്ചേമുക്കാലോടെയാണ് അറസ്റ്റിലായവര്‍ക്ക് ജാമ്യം നല്‍കി ലോറി വിട്ടയച്ചത്.
Mathrubhumi Alppuzha News 08 Mar 2012
No comments:
Post a Comment